19 ਤੂੰ ਅੰਨ੍ਹਿਆਂ ਨੂੰ ਰਾਹ ਪਾਉਣ ਵਾਲਾ, ਹਨੇਰੇ ਵਿੱਚ ਰਹਿਣ ਵਾਲਿਆਂ ਲਈ ਚਾਨਣ, 20 ਮੂਰਖਾਂ ਦਾ ਸਿੱਖਿਅਕ ਅਤੇ ਅਗਿਆਨੀਆਂ ਦਾ ਗੁਰੂ ਹੈਂ। ਤੂੰ ਸਮਝਦਾ ਹੈਂ ਕਿ ਵਿਵਸਥਾ ਵਿੱਚ ਤੈਨੂੰ ਗਿਆਨ ਅਤੇ ਸੱਚ ਦਾ ਪ੍ਰਤੱਖ ਰੂਪ ਪ੍ਰਾਪਤ ਹੋਇਆ ਹੈ।
2:19
ਤੂੰ ਅੰਨ੍ਹਿਆਂ ਨੂੰ ਰਾਹ ਪਾਉਣ ਵਾਲਾ, ਹਨੇਰੇ ਵਿੱਚ ਰਹਿਣ ਵਾਲਿਆਂ ਲਈ ਚਾਨਣ
ਇੱਕ ਯਹੂਦੀ ਹੋਣ ਦਾ ਛੇਵਾਂ ਫਾਇਦਾ ਇਹ ਸੀ ਕਿ ਉਸ ਕੋਲ ਸੰਸਾਰ ਤੱਕ ਪਰਮੇਸ਼ਰ ਦੇ ਸੰਦੇਸ਼ ਨੂੰ ਪਹੁੰਚਾਉਣ ਦਾ ਅਧਿਕਾਰ ਸੀ। ਆਇਤ 19 ਅਤੇ 20 ਵਿੱਚ ਚਾਰ ਉੱਤਮਤਾਵਾਂ ਦੱਸੀਆਂ ਗਈਆਂ ਹਨ ਜਿਹੜੀਆਂ ਯਹੂਦੀਆਂ ਨੂੰ ਪ੍ਰਕਾਸ਼ਨ ਦੇ ਕਾਰਨ ਗ਼ੈਰ-ਯਹੂਦੀਆਂ ਉੱਤੇ ਪ੍ਰਾਪਤ ਸਨ। ਉਹ ਬੀਤੇ ਸਮੇਂ ਵਿੱਚ ਇਸ ਗੱਲ ਉੱਤੇ ਪੱਕਾ ਯਕੀਨ ਰੱਖਦੇ ਸਨ (ਅਤੇ ਇਹ ਯਕੀਨ ਹਾਲੇ ਵੀ ਉਹਨਾਂ ਵਿੱਚ ਬਣਿਆ ਰਹਿੰਦਾ ਸੀ) ਕਿ ਪਰਮੇਸ਼ਰ ਨੇ ਉਹਨਾਂ ਨੂੰ ਗ਼ੈਰ-ਯਹੂਦੀਆਂ ਦੀ ਸਿੱਖਿਆ ਦੇਣ ਦੁਆਰਾ ਸੇਵਾ ਕਰਨੀ ਹੈ, ਕਿਉਂਕਿ ਗ਼ੈਰ-ਯਹੂਦੀਆਂ ਕੋਲ ਪ੍ਰਕਾਸ਼ਨ ਨਹੀਂ ਸੀ।
2:20
ਮੂਰਖਾਂ ਦਾ ਸਿੱਖਿਅਕ ਅਤੇ ਅਗਿਆਨੀਆਂ ਦਾ ਗੁਰੂ ਹੈਂ, ਵਿਵਸਥਾ ਵਿੱਚ ਤੈਨੂੰ ਗਿਆਨ ਅਤੇ ਸੱਚ ਦਾ ਪ੍ਰਤੱਖ ਰੂਪ ਪ੍ਰਾਪਤ ਹੋਇਆ ਹੈ
ਇੱਕ ਯਹੂਦੀ ਹੋਣ ਦਾ ਸੱਤਵਾਂ ਫਾਇਦਾ ਇਹ ਸੀ ਕਿ ਉਹ ਪਵਿੱਤਰ ਗ੍ਰੰਥ ਦੀ ਸਮੁੱਚੀ ਰੀਤੀ ਨੂੰ ਸਮਝਦਾ ਸੀ। ਯੂਨਾਨੀ ਸ਼ਬਦ “ਰੂਪ” ਦਾ ਅਰਥ ਹੈ ਮੂਰਤ ਜਾਂ ਢਾਂਚਾ। ਪਰਮੇਸ਼ਰ ਨੇ ਯਹੂਦੀਆਂ ਨੂੰ ਅਨੁਮਾਨ ਲਗਾਉਣ ਦੇ ਲਈ ਨਹੀਂ ਛੱਡਿਆ ਸੀ; ਪਰ ਉਸ ਨੇ ਉਹਨਾਂ ਨੂੰ ਇੱਕ ਖ਼ਾਸ ਅਤੇ ਅਲੌਕਿਕ ਪ੍ਰਕਾਸ਼ਨ ਦਿੱਤਾ ਸੀ। ਇਹ ਲੋਕ ਪਵਿੱਤਰ ਗ੍ਰੰਥ ਦੀ ਰੀਤੀ ਨੂੰ ਸਮਝਦੇ ਸਨ, ਅਤੇ ਅੰਦਰੋਂ ਉਸ ਦੇ ਅਨੁਸਾਰ ਚੱਲਦੇ ਸਨ। ਇਹ “ਰੂਪ” ਸੱਚ ਦੇ ਗਿਆਨ ਦੇ ਲਈ ਠੀਕ ਬੈਠਦਾ ਹੈ।
ਇੱਕ ਗ਼ੈਰ-ਯਹੂਦੀ ਜਿਸ ਦੇ ਕੋਲ ਬਿਵਸਥਾ ਨਹੀਂ ਹੈ, ਪਰ ਉਸ ਦਾ ਆਦਰ ਕਰਦਾ ਹੈ, ਉਹ ਉਸ ਯਹੂਦੀ ਨਾਲੋਂ ਘੱਟ ਫਾਇਦੇ ਵਾਲੀ ਥਾਂ ਉੱਤੇ ਨਹੀਂ ਹੈ ਜਿਸ ਕੋਲ ਬਿਵਸਥਾ ਤਾਂ ਹੈ, ਪਰ ਉਹ ਉਸ ਉੱਤੇ ਚੱਲਦਾ ਨਹੀਂ ਹੈ। ਆਪਣੇ ਸਾਰੇ ਫਾਇਦਿਆਂ ਦੇ ਬਾਵਜੂਦ, ਯਹੂਦੀ ਲੋਕ ਮਸੀਹਾ (ਯਿਸੂ) ਨੂੰ ਆਪਣਾ ਮੁਕਤੀਦਾਤਾ ਮੰਨਣ ਵਿੱਚ ਅਸਫ਼ਲ ਰਹੇ।
ਸਿਧਾਂਤ:
ਮਸੀਹ ਹੋਣ ਦੇ ਨਾਤੇ ਸਾਨੂੰ ਮਿਲੇ ਫਾਇਦਿਆਂ ਦੇ ਬਾਵਜੂਦ, ਇੱਕ ਖੋਖਲਾ ਆਤਮਿਕ ਜੀਵਨ ਬਤੀਤ ਕਰਨਾ ਸੰਭਵ ਹੈ।
ਲਾਗੂ ਕਰਨਾ:
ਸਾਡੇ ਲਈ ਇਹ ਸੁਭਾਵਿਕ ਹੈ ਕਿ ਅਸੀਂ ਆਪਣੇ ਆਪ ਨੂੰ ਦੂਜਿਆਂ ਨਾਲੋਂ ਚੰਗਾ ਸਮਝੀਏ। ਅਸੀਂ ਆਪਣੀ ਪੜ੍ਹਾਈ, ਆਪਣੇ ਤਜ਼ਰਬਿਆਂ ਅਤੇ ਆਪਣੀਆਂ ਕਾਮਯਾਬੀਆਂ ਵੱਲ ਇਸ਼ਾਰਾ ਕਰਦੇ ਹਾਂ। ਦੂਜਿਆਂ ਉੱਤੇ ਆਪਣੀ ਉੱਤਮਤਾ ਬਾਰੇ ਆਪਣੇ ਆਪ ਨੂੰ ਧੋਖਾ ਦੇਣਾ ਸਾਡੀ ਰੂਹਾਨੀ ਤਬਾਹੀ ਦਾ ਕਾਰਨ ਬਣੇਗਾ। ਇਹ ਹੋ ਸਕਦਾ ਹੈ ਕਿ ਅਸੀਂ ਮਸੀਹ ਵਿੱਚ ਆਪਣੇ ਫਾਇਦਿਆਂ ਨੂੰ ਤਾਂ ਜਾਣਦੇ ਹੋਈਏ, ਪਰ ਉਹਨਾਂ ਨੂੰ ਆਪਣੇ ਜੀਵਨ ਵਿੱਚ ਨਾ ਲਾਗੂ ਕਰੀਏ।
